Traimerdia ta resorta bou di Ministerio di Asuntonan Social y Labor.
Meta di Traimerdia: formenta desaroyo y formacion sano di nos muchanan, pa medio di un cuido y guia di calidad despues di oranan di scol.
Traimerdia ta destina pa muchanan cu ta bai scol preparatorio, basico y special. Centronan ta situa den edificionan di scol.
E muchanan ta ricibi un acogida cu tin mas tanto posibel e calor di un hogar.
Bou guia profesional e muchanan ta haña guia den nan desaroyo, pa loque ta e aspectonan cu tin di haber cu enseñansa en general, guia den trahamento di huiswerk, descanso obligatorio y actividadnan riba tereno di musica, baile, drama, pintamento, obra di man, deporte y recreacion.
Muchanan tin oportunidad amplio pa hunga y desaroya nan mes pa medio di wega y na mes momento wordo guia den nan desaroyo social-emocional.